CALIGNONUS Sofridus

CALIGNONUS Sofridus

Gratianopolitanus, Cancellarius Navarrae, Philosophus, Mathematicus, ICtus, Politicus, inter sui aevi primos, in Edicto Namnetensi formando cum Thuano per triennium occupatus, Protestantibus a Rege henrico M. obtinuit, ut Carentonii divinum Cultum illis peragere liceret, cum prius id fieret in vico Blond, quatuor vel quinque leucis Lutetiâ distante, Scripsit Apologiam Regis Navarrae, contra librum, cui tit. Incendium Calvinisticum a Navarri Legatis, apud quosdam Imperii Ordines, ad certam Religionis ac Rei publ. conturbationem, procuratum, aliaque. Obiit A. C. 1607. aetat. 56. non sine desiderio Regis, qui illum Cancellarium Franciae facturus erat, nî in Religione sua perseverare maluisset. Alardus in Vita eius, Chorerius Epitom. Histor. Delphin. l. 10. Du Verdier, Anton. Teissier Elogiis Volum. 2. ubi etiam Bullae Sixti V. Contra henricum tum Navarrae Regem respondisse, editô librô, addit.